Genesis 46

UJakhobe Uya eGibhithe

1Yikho u-Israyeli wasesuka kanye lakho konke okwakungokwakhe, wathi ngokufika eBherisheba wenza umhlatshelo kuNkulunkulu kayise u-Isaka.

2UNkulunkulu wakhuluma ku-Israyeli ngombono ebusuku wathi, “Jakhobe! Jakhobe!” Waphendula wathi, “Ngilapha.”

3Wathi, “NginguNkulunkulu, uNkulunkulu kayihlo. Ungesabi ukwehlela eGibhithe, ngokuba ngizakwenza ube yisizwe esikhulu khonale. 4Mina ngizahamba lawe khonale eGibhithe, njalo ngiqinisile, ngizaphinde ngikubuyise. Isandla sikaJosefa sona ngokwaso sizawavala amehlo akho.”

5UJakhobe wasesuka eBherisheba, kwathi amadodana akhe u-Israyeli amthatha uyise uJakhobe, labantwababo kanye labomkabo babafaka ezinqoleni uFaro ayezithumele ukubathwala ngazo. 6Bathatha njalo lezifuyo zabo kanye layo yonke impahla yabo ababeyiqoqile eKhenani, uJakhobe losendo lwakhe lonke baya eGibhithe. 7Wathatha amadodana akhe, labazukulu bakhe, lamadodakazi akhe lamadodakazi awo – sonke isizukulwane sakhe – waya eGibhithe.

8La ngamabizo amadodana ka-Israyeli (uJakhobe labazukulu bakhe) abahambayo eGibhithe: uRubheni izibulo likaJakhobe.

9Amadodana kaRubheni: uHanokhi, loPhalu, loHezironi, kanye loKhami.

10Amadodana kaSimeyoni: uJemuyeli, loJamini, lo-Ohadi, loJakhini, loZohari kanye loShawuli indodana yomfazi ongumKhenani.

11Amadodana kaLevi: uGeshoni, loKhohathi kanye loMerari.

12Amadodana kaJuda: u-Eri, lo-Onani, loShela, loPherezi kanye loZera (kodwa u-Eri lo-Onani babefele elizweni laseKhenani). Amadodana kaPherezi: uHerizoni loHamuli.

13Amadodana ka-Isakhari: uThola, loPuwa, loJashubi kanye loShimironi.

14Amadodana kaZebhuluni: uSeredi, lo-Eloni kanye loJahileli.

15La ayengamadodana uLeya awazalela uJakhobe ePhadani Aramu, ngaphandle kwendodakazi yakhe uDina. Amadodana la lamadodakazi akhe babengamatshumi amathathu sebebonke.

16Amadodana kaGadi: uZefoni, loHagi, loShuni, lo-Eziboni, lo-Eri, kanye lo-Areli.

17Amadodana ka-Asheri: u-Imina, lo-Ishiva, lo-Ishivi loBheriya. Udadewabo wayenguSera. Amadodana kaBheriya: uHebheri loMalikhiyeli.

18Laba ngabantwana abazalelwa uJakhobe nguZilipha, uLabani ayemuphe indodakazi yakhe uLeya – belitshumi lesithupha sebebonke.

19Amadodana omkaJakhobe uRakheli: uJosefa loBhenjamini. 20EGibhithe uJosefa wazala uManase lo-Efrayimi ku-Asenathi indodakazi kaPhothifera, umphristi ka-Oni.

21Amadodana kaBhenjamini: u-Bhela, loBhekheri, lo-Ashibeli, loGera, loNamani, lo-Ehi, loRoshi, loMuphimi, loHuphimi kanye lo-Aridi.

22La ayengamadodana kaRakheli awazalela uJakhobe – elitshumi lane esewonke.

23Indodana kaDani: nguHushimu.

24Amadodana kaNafthali: uJahiziyeli, loGuni, loJezeri kanye loShilemu.

25La ayengamadodana kaJakhobe awazala loBhiliha, uLabani ayemuphe indodakazi yakhe uRakheli – beyisikhombisa bebonke.

26Bonke labo abaya eGibhithe loJakhobe – labo ababeyinzalo yegazi lakhe, kungabalwa omalokazana bakhe – kwakungabantu abangamatshumi ayisithupha lesithupha.

27Sekubalwa lamadodana amabili azalwa nguJosefa eGibhithe, abendlu kaJakhobe abaya eGibhithe babe ngamatshumi ayisikhombisa sebebonke.

28UJakhobe wathuma uJuda ngaphambili kwakhe kuJosefa ukuba amlayele indlela eya eGosheni. Bathi sebefikile emmangweni waseGosheni, 29uJosefa walungiselwa inqola yakhe waqonda eGosheni ukuyahlangana loyise u-Israyeli. UJosefa wonela ukumuthi nhla wamgona uyise, wakhala okwesikhathi eside.

30U-Israyeli wathi kuJosefa, “Manje sengikulungele ukufa, ngokuba sengizibonele mina ngokwami ukuthi usaphila.”

31Yikho uJosefa wasesithi kubafowabo lakubo bonke abomuzi kayise, “Ngizahamba ngiyekhuluma loFaro ngithi kuye, ‘Abafowethu kanye labendlu kababa ababehlala elizweni laseKhenani sebezile kimi. 32Amadoda la angabelusi; belusa izifuyo, yikho beze lemihlambi yabo yezimvu leyezinkomo lakho konke abalakho.’ 33Nxa uFaro angalibiza alibuze athi, ‘Umsebenzi wenu ngowani?’

34libophendula lithi, ‘Izinceku zakho zingabelusi bezifuyo kwasebufaneni bethu kuze kube manje, njengabokhokho bethu.’ Yikho lizavunyelwa ukwakha emmangweni waseGosheni, ngoba bonke abelusi bayeyiseka kumaGibhithe.”